საქართველოს ფეხბურთის ფედერაციის, კომპანია „სოკარის" და ქართული ფეხბურთის განვითარების ფონდის ხელშეწყობით 3 კვირის განმავლობაში მიმდინარეობდა „ზაურ კალოევის სახელობის თასის გათამაშება" 2005 და 2006 წლებში დაბადებულ ჭაბუკებს შორის.
ტურნირმა სტარტი 15 ოქტომბერს აიღო და 28 ოქტომბერს დასრულდა. მონაწილეობა მიიღო 8 გუნდმა, რომელთაგან 4 საუკეთესო გამოიყო. მატჩი მე-3 და მე-4 ადგილებს შორის მეტად საინტერესოდ წარიმართა. ერთმანეთს „განთიადი" და „ერგნეთი" დაუპირისპირდნენ. მატჩის ძირითადი დრო ფრედ 2 - 2 დასრულდა. პენალტების სერიამ კასპის „განთიადს" დამსახურებული მესამე ადგილი მოუტანა.
ასევე უნდა აღინიშნოს ფინალური შეხვედრა,სადაც ერთმანეთს 2 უძლიერესი გუნდი კასპის „სამთავისი" და აჩაბეთის „ლიახვი" შეხვდნენ. გადამწყვეტი მატჩი საკმაოდ დაძაბული გამოდგა, მაგრამ „სამთავისმა" პირველობა არავის დაუთმო და 4 ბურთის გატანაც არ გასჭირვებია.
ფინალური შეხვედრის შემდეგ გაიმართა დაჯილდოების საზეიმო ცერემონიალი. მონაწილე გუნდები დასაჩუქრდნენ შესაბამისი დიპლომებით, მედლებითა და თასებით.
ბავშვთა ფეხბურთის განვითარებისათვის მნიშვნელოვანია სწორედ მსგავსი ტიპის ტურნირების ორგანიზება, რაშიც დიდ როლს თამაშობს სპონსორის აქტიური ჩართულობა. ამ შემთხვევაში, გუნდის ყველა მოთამაშის, მათი მწვრთნელების და ჩვენი ფედერაციის სახელით გვინდა დიდი მადლობა გადავუხადოთ კომპანია „სოკარს", საქართველოს ფეხბურთის ფედერაციას და ქართული ფეხბურთის განვითარების ფონდს გვერდში დგომისთვის. ვიმედოვნებთ, რომ მომავალშიც მოვაწყობთ მსგავს ღონისძიებებს და მონაწილეობას მივიღებთ პატარა ვარსკვლავების აღზრდაში! |